شبكة ومنتديات ضحكة العراق
اهلا بك زائرنا الكريم :)

اذا كنت عضو مسجل لدينا فيرجى الدخول الى المنتدى :)

او اذا كنت زائر ليس مسجل لدينا فنتمنى ان تسجل في منتدانا وتكون احد افراد اسرة منتدى ضحكة العراق :)


مع تحيات ادارة الموقع :)

شبكة ومنتديات ضحكة العراق

شبكة ومنتديات ضحكة العراق هي ملتقى لكافة العراقيين والعرب من كافة انحاء العالم
 
الرئيسيةالمجلةالبوابةمكتبة الصورس .و .جبحـثالأعضاءالتسجيلدخول
ادارة الموقع لقد ساهمت في هذا الموضوعيا ترحيب يكتب بالانوارلقد ساهمت في هذا الموضوعوالنور عم المنتدى مع حضوركم..لقد ساهمت في هذا الموضوعأهلا و سهلا و مرحبا بكم في شبكة ومنتديات ضحكة العراقلقد ساهمت في هذا الموضوع

شاطر | 
 

  تعرّف على الابو ذيه ونماذجها

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
اميره بـ مملكتي
عضو محترف
عضو محترف
avatar

smsضحكة العراق : أهلا و سهلا بك يا زائر
عدد المشاركات : 239
تاريخ التسجيل : 23/08/2010
العمر : 24
التقييم : 0
نقاط : 4839
الجنس : انثى الابراج : الثور
العمل/الترفيه العمل/الترفيه : طالبه
المزاج : متقلب
الأوسمة :
الموقع : علمي الخاص{فوق السحاب}

مُساهمةموضوع: تعرّف على الابو ذيه ونماذجها    الثلاثاء أغسطس 31, 2010 2:08 am

الابوذية ضرب من ضروب الشعر الشعبي مؤلف من بيتين بأربعة اشطر ثلاثة منها في جناس واحد يتحد في اللفظ ويختلف في المعنى وينتهي الشطر الرابع منه بحرفي ( الياء والهاء ) أما في حالة الغناء فله أطوار عديدة والبيت الواحد من الابوذية يستطيع المطرب أن يؤديه على أي طور يشاء وللأطوار أنغامها أيضاً .


فمن الأطوار ما ينسحب على نغم البيات وما ينسحب على السيكاه أو الحجاز أو الصبا وغيرها من الأنغام .


والابوذية واحد في وزنه وتركيبه وان اختلفت مفرداته بين حوار المدينة وحوار الريف العامي ، أي لهجة المدينة ولهجة الريف ، والابوذية هو من بحر الوافر كما ورد في عروض العر . . . للخليل بن احمد الفراهيدي ( مفاعلتن مفاعلتن فعول ) .




إن كلمة الابوذية جاءت من معنى الاذيه . وتدل تركيبة الابوذيه من حيث الوزن الذي هو ( الوافر ) أو حيث الجناس الثلاثي والقفله في الشطر الرابع التي تنتهي دائماً بحرفي الياء والهاء والشيء الآخر الذي يتميز به (الابوذيه) عن سواه من أنماط الشعر الآخر هو انه لا ينظم إلا على بحر واحد وهو بحر الوافر . ومن الأدلة التي تثبت عراقية هذا الموروث الشعبي :



1- إن تركيبة الابوذيه لم يطابقها في الفارسية نظماً مشابهاً له لا من حيث المعنى ولا من حيث العروض .


2- إن الابوذيه فن من الفنون الشعبية وترجمة لأحاسيس ومشاعر إنسانية عاشها الإنسان العراقي خلال حقب متراكمة من الزمن . فراح يجسد ويترجم معاناته بلهجته الخاصة وحسب الحوار اليومي الذي يدور في منطقته وكثيرة هي اللهجات المحلية في المدينة والريف والبادية وتختلف مفردات حوارها من منطقه إلى أخرى . فأبن الريف قد ترجم معاناته بالابوذيه وغيره من ألوان الغناء الريفي ، وابن البادي ترجم احاسيسه (بالحدي والسامري والهجيني والمسحوب وغيرها ... ) .


والأنباط ترجموا معاناتهم بالشعر النبطي والذي مازال منتشراً في الجزيرة العربية .







حمامة الفرت من ايدي ولاجت

وعليها الروح تتعـذب ولاجت

من أمس لليوم لاحطت ولاجت

ولا إلها جدم بــرض الوطيه


***


حبيبي شيوصلك وانـت ثريه

نشف دمعك وانه دموعي ثريه

رغم عسري تظل نفسي ثريه

بظلام الليل اوجن لـك ثريه

ولن كلبك بلا رحــمه ثريه


***

***

الدهر يا صاح بالفرقه ولانه

ولانوبه انكسر كلـبه ولانه

لا انت عرفت الحـب ولانه

نسينا الشوك واخلفـنا وعدنا

وعلى الهجران ردينا وعدن

هذا من الوكت والحب وعدنا

يفر بيه الوكت نوبه وفر بيه

ومن ثلج العمر دربي وفر بيه

اشرد وين انا بكلبي وفر بيه

بدرب مسدود ومتيه محـله

ادموعي جم ذنب كلبك محله

بعد طير بضباب ابدا محـله

ولا أظن بعد نتلاكَه سـويه

***



بتاج الفرح ولــفي توجاني

وحسن ردلي شبابي توجاني

من أثمار المحــبة توجاني

كلبي الشبع ضيم مـن الأذية





ومن الأبوذيات أيضاً ما يقال في ( التوجع ) .


للشاعر جودت التميمي



يكاس العمر ما ظلت وشل بيك
ويجرحي لشوكت تنزف وشل بيك
تكلي ليش متمرمـــر وشل بيك
تهت منهو اليـــــدليني عليه








وفي ( الصبر والرجاء )

للشاعر عبد الأمير طويرجاوي



همي من كـــثر يذبل وراها
ونار الكلب مــا يخمد وراها
كل شده يـــهل وادم وراها
فرج ، والفرج من رب البريه




وفي ( الاجتماعيات )

للشاعر عباس الخياط


الصديق اللي نشوفه نقي ونظيف
نود كل يوم نبدي اعليه ونضيف
على طيبه نجمل طيب ونضيف
بكثر معنى الحـروف الابجديه






--------------------------------------------------------------

الابتكارات في بناء الابوذيه

المتفق عليه إن الابوذيه التقليدي يتألف من اربعة اشطر ثلاثه منها في قافيه واحد متشابهة في اللفظ ومختلفة في المعني أي تعتمد على الجناس ، لكن هاجس البحث عن الجديد والنزوع إلى الابتكار ، دفعت البعض من الشعراء إلى كسر الطوق التقليدي في الكثير من القوالب الشعرية ومنها الابوذيه . فكتبه البعض من أربعة شطور متجانسة كلها ، أي من جناس واحد .. .

وهذا النموذج الابوذيه الرباعي:



أريد اعبر بحــر دمعي وفيه

وعليج اكطع ألف فيه وفيه

ابشمس حبج انه معذب وفيه

وما عندج وفه واسـمج وفيه





--------------------------------------------------------------

الأبوذية الخماسية في التجانس


كما في الابوذيه الثانية من هذه الصفحة ( حبيبي شيوصلك وأنت ثريه). ارجع للأعلى .



ويعتبر الشاعر الشيخ حسين بن علي الكر بلائي هو أول من برع في إضافات الشطور المضافة إلى الابوذيه كالتخميس في شطورها أو المواصلة في نظم العديد من الشطور في نفس البحر وذلك لكي يضفي على مجالس الطرب مزيداً من المتعة في الغناء .


--------------------------------------------------------------


الأبوذية المنثورة

يسميها البعض (المطشر) وهي تسميه شعبيه تعني (المنثور) ويمكن غناء المنثور في جميع الأطوار وهو لا يختلف عن الابوذيه التقليدية إلا باضافه بعض التفعيلات إلى الشطر الثالث بما يشبه طريقه السجع لإضفاء شيء من جمالية الصنعه الشعرية والتطريبية معاً ، وهذه الطريقة هي من المبتكرات الحديثة وهذا نموذج :



***

عليك اهواي ونـينه ولعنه
شجاك انسيت يمدلل ولعنه


متى اتواصل

كلب ذابل

جسد ناحل

دمع سايل

حجي الباطل

رمح شاتل

على العاذل

أريد ادعي بكلب ذايب ولعنه

وشاك وغير اطـباعك عليه


***




أول من نظم الأبوذية المنبريه

الشعراء عبد الأمير الفتلاوي وعبود غفله وحسين الكر بلائي أول من نظموا الابوذيه المنبريه أو ما يسمى بالحسيني وبطريقه النعي ، وهنا الشاغر حسين العبادي يطرح بعض الأسئلة الشعرية والألغاز :

شنهوا اللي على المخلوك داره
وشنهوا العاف بزره وسكن داره


وشنهوا المايعيش بغــير داره

وشنهوا الما ينـــام إلا بتحية


أما الجواب فمن الشاعر الملا حسين الكر بلائي بعد حقبه طويله من الزمن على رحيل الشاعر حسين العبادي :



الكمر يلي على المـخلوك داره

الزرافه العاف بزره وسكن داره

السمج الما يعيش بغــير داره

الفيل الما ينــــام إلا بتحيه



أحبابي اشنـون حــالتــكم بعدنا
اشبدينا والوقـــت عنـــكم بعدنا
إذا انتم نسيتونا ترى احنا بعدنا
أبذكركم كل صباح وابكل مسيه



مرة اصفن علـيكم مرة سايل
مرة الدمع ناشــف مرة سايل
مرة احتار شكتب من رسايل
مرة انتظر ســــاعات المنية



أتلعثم من أشوفــــــــن وسطك أنا
أومنوا لوشوش بذانك واسطك أنا
تقلي ويــنك أنتــــــــه وسطك أنا
تــدور بــالنـبـض تـعـــــثر عليه



احبك ما أحب عل الأرض سواك
سبحان الذي من طــــــــين سواك
بشر لكنه ويال القــــــــمر سواك
واحد فوق واحد بــــــــــين ايديه






أشنون الروح اكضها من تهم بيك
أو مثل تهمه حبـيــبي من تهم بيك
الضيم اليمر بــــــيا منته تهم بيك
ولاجنك وأنا مبـــــــــــــين عليه



أصد وازعل وادير العين طبعان
لجن لجمات إلك بالقلــب طبعان
حلو بكلشي لكن بيــــــك طبعان
تـشــــك وتــغار بيــــــــها عليه



أنا دلولي نحر بيا البــين يسعى
ثقل همي ولالي صـــدر يسعى
اليغص بالزاد أهو للماي يسعى
وانا بالماي اغص أشــــنون بيه



بديت أوماعرفت أمنين بدواي
عليل أوحارت العربان بدواي
إذا أنته طبيب اتعــرف بدواي
الحقني بالشفا قبــــــــل المنيه




نفس ونريد شمـك ياهوانا
العمر ذله ابغيابك ياهوانا
أتيه الروح يمــك ياهوانا
خيالك مرهم ودلاها عليه



حبيبي اختارك الــــدلال واشراك
عجب تحفر حفر لهواك واشراك
وحق مني الاله إنـــــداد واشراك
أحبك لو تصير احــــــــزاب إليه



نقل طرف الجذيله وحـــــيل يرها
حجي الغالب على المغلوب يرها
أنا روحي أشعره والمجنون يرها
لون عــــاقـل تــرك منـــها بـقـيه



حبيبي اديارنا لـــــــوجيتوا مرها
أونفسك عالوفـــــا والطيب مرها
أنا عشرتك ضقت حلوتها ومرها
بويا طلع مــــرها أمر امن المنيه



أبات الليل بالحـــسرات منطر
تضل عيني على البيـبان منطر
شفت خذها عبالي الفجر منطر
قمت صليت من غــصبن عليه



جمالك زاد عن يوســف وقبله
وحبك صار لي منــــــبر وقبله
أمر أعلى الصخر يافلان وقبله
لأن قلبك صخر مـــــاحن عليه



يدنيا انتي ابعدابي ليــــــش تسعين
ابعزم الله إشماعندش ضيج تسعين
اخوتي ابيوم ضرفي حــلو تسعين
بعد ما ادري الوقت مــامنهم بجيه



أبعز نومي إجى طيفك وعاني
أنا وشكثر أتحملت منك وعاني
إجيتك أومعتني إبدارك وعاني
ولامــره إجـــيت انـــــته عليه




اشمالك يازماني عـلي صليت
ابنار وحمسيت اجلاي صليت
مثل ماصلت ام عمران صليت
فنكحني الهوه وذبــني بنويه



المصايب بس على روحي تلافت
يقلبي اعله النكر طيــبك تلافت
اون وعطامي بهــجرك تلافت
طريح وســاد دوب النفس بيه



يدنيا إشمال دولابج يناحي
ومن الصوبين كسرتي جناحي
أنا الكنت أمر وناهي
صرت شبوط والفالات بيه


أبد مازلزلك حالي وهدك
عفاه اشيحمل الكلفه وهدك
قصدي بس اصيدنك وهدك
واريد اتصير حر وترد إليه



صب دمعي على الوجنات ياهل
أوماتدرون بيا اشصـــــار ياهل
صرت عصفور جني بيـد ياهل
أهـو يــلعب وانــا اشــــنون بيه



لويت الدهر مافد يـــوم حنيت
وديا من دموع العــــين حنيت
ييمه اوداعتج هالـــــيوم حنيت
أوشلت نار الدمع بجفوف أديه



أنا ابميزان الهوى عاني كفاني
أوحي لاتحسب العاشق كفاني
أناتبت قلت الدي بـــــيا كفاني
أنا شجاني اوعاودة سوده عليه



شهر سيف الهجر ضدي وسله
نساني اوراح وي غيري وسله
عنب ماحصلت مـــــــنه وسله
طلع ذيب أوكتلني اربـات إديه



وسفه الدهر شتتــكم وطركم
حسافه ماكـضه منهم وطركم
بذجركم هذا انه اهذي وكركم
يعيد الله شتتـــكم جمع ليه




تبنا من العشـــــــق واردود عدنه
وحسبنا اسنين مره وتــــــاه عدنه
أهوايه بالسلف حلـــــــوات عدنه
لون روحك صدق خضره وطريه



زماني جرد اســيوفه وسنهه
عليه اوحرمــت عيني وسنهه
وحق اللي فرض خمسه وسنهه
بعد هيهات عيـش ايصير اليه



أنا ماحسبت لن شــوقك وبالي
وعودي ذبل بفــــــراقك وبالي
أقوم أنا أويا الربع واقعد وبالي
بويا يمك ولشـــــواق أدور بيه



يحادي روعت قلبي بلحداي
يخايب لفني وياهـم بلحداي
اون طول الدهر حتى بلحدي
على الساروا وخلوني شجيه



حبك من شفـــــاف القلب عتباي
ولانوبه أذكرتنا واوصلت عتباي
أعتب مانفـــــــــــع وياك عتباي
على ياهي أزعـلت واقطعت بيه



هذا البيه كنتـــم لايميني
وعذر مافاد بيــكم لايميني
لو تكتف يسـاري وي يميني
هذاك انه الهوى غالب عليه



بــودادك آخ للـــــــــــدلال فخار
جدب كلمن عليه الجـــــــد فخار
اختلاج الناس من صلصال فخار
وحبيبي اختلق بالقـــــدره العليه



اف من زماني اه منه
على اللي عشرتي وياه منه
اكله الدرب هذا يكول منه
اكله فوت بيه يرد عليه



صعدت اجبال فوق اجبال عالي
أوصرخت صوتين يم قدله تعالي
يـنـيـت قـــصـر بـالجـــنه تعالي
نــرد نـســـكن أنـــا ونــته سويه



كحل بالعـــين أحـــــــــبابي يحطون
أوياحربه أمسومره أبقصبى يحطون
ياليت أهلك أبجــــنب أهلي يحطون
نـــنام أثـنـيـــنا أونلتــــــــــف سويه



روى الزيتون من دمعي ولاراك
أوغيرك مانحل جسمي ولاراك
أخاف أطول غيبتكم ولاراك
وعند وصلك تدانيني المنيه



دمه دمع البيابي سال وانهات
عليك اكضي العمر حسرات وانهات
بهواك انه اعذلتني الناس وانهات
ما خذني الهوه غصبن عليه



روحي برشف خدك من عداها
احب وصلك وهابك من عداها
افراكك يوم احمله ، من عداها
ازورك لو تصير احزاب اليه



قلبي مافرح عقـــــــــــبك ولاسار
ولاجذمي ماخطى الغيرك ولاسار
أخبرك مابقت جـــــــــلمه ولاسار
فضحني الدمع من غصـــبن عليه


يشقر عــــــن اودادك سنلها
اونارك تسعر ابجبدي سنلها
ساعه الفــــارقت بيها سنلها
اشحال افراقـك يومينك عليه



وحك آية عصا موسى وسينا
الك حثت رجــايبنه وسينا
الك حسن النبي يوسف وسينا
الي والنور الك والنـار اليه



أريد أرحل ابضعن الشوق وحداوي
أوقلت هذا قراري أوياك وحداي
أريدك بس إلي خاص وحداي
مو عين الهاي أوعين إليه



انت الشمس وانت البدر منهل
وشفافك طعم العســـــل منهل
كلبي بس إلك ياتــــرف منهل
الورد من تمر ياخـذ لك تحيه



كل مغرم برت علتـــه وناله
سعيد اللي حضه بشخصك وناله
الطارش من سمع نوحـي وناله
ترك شغله وبجه رحمــه عليه



حبي إلك مافد يـــــــــــــوم ينقص
أوليش الصاحب أمن ايغيب ينقص
زمن خل الحديد ابخشــــب ينقص
ويخلـــــــــــــي الماله اول بالثنيه



بعدني ألف وسفه الوقت عنك بعدني
أموت أو أرتجي وصــــــلك بعدني
أوتراني عالعهد باقـــــــــــي بعدني
تراك أنت النظــــــــــر والحيل بيه



ناحل وامشي امكابر تراني
اجلد خاف عـدواني تراني
تاره الموت يدهـاني تراني
اصحه من يمر شامت عليه



علامات الكبر بـانت ولاحن
أوخويا المنكسر قلبه ولاحن
بعد ما أنشد عنــــهم ولاحن
ولاحن بعد بالمـــــــالي بيه



عقلي ياترف حبـــــك وجن بيك
من الجوري يمحبوبي وجن بيك
إجيت انتوعـــــــــدك وجن بيك
ليالي الفرح وايــــــامي الزهيه



حجايانا قضن يشـــــــقر وكتهن
ولون يحصل مجال إلهن وكتهن
أنا القى أدموع بعيــوني وكتهن
أودمعي خلص وانقــــــطع ميه



قوم انصب يصاحب ماتم النه
على الوياه ليــله ماتم إلنه
لون الرجل يمــلك ماتمنه
مهو بالهون فــركاهم عليه



بتاج الفرح ولفــــي توجاني
وحسن ردلي شبابي توجاني
من اثمار المحبــــه توجاني
قلبي الشبع ضيم أمن الاديه



نصحته اولا نفـــع وياه نصحاي
سكاره احنه بهــواه مابعد نصحاي
جفاني وصرت نصي ميت نصحاي
نحيـــل ولا اثــــر نكاد بيه



مر ولفي ايهبتـني ومره هبته
ومره اوصلت يمـه مره هبته
طحت مقدر يصاحب مره هبته
اسد يخسه الاسد ملقــاه اليه



وحق التعبده شيعه وسنه
ذوله الحرموا نومي وسنه
عليك اسيوف جردنه وسنه
علمك يلعبدت اشميت هيه



أحبـــج ما أحب غــــــيرك بدالاج
أوشوقي مابدى الغيرج بس بدالاج
أنــا ويـن القــى يا ......... بدالاج
مــلاك ومــن الســـــما نازل عليه



وحق الالف واللامــين والها
روحي بهوى ساهي العين ولها
لها ثغر وجبين وعــين والها
خذ شبه البدر لو سـطع ضيه



سريتوا بالضعن ياترف هاوين
جفيتوني ولعـند الغير هاوين
هاميت يحلو الطــول هاوين
حياتي والنظر اقــبالك عليه



سمر لو بيض يعجبني شكلجن
تنور اشماتــــــــقللي ابشكلجن
لون واحد على حـالي شكلجن
بويا تحنـنـتن وانا النــيران بيه


الرد

اشتــبي مــنا تســــألنا ابـــشكلـــــنا
بويا ورد جوري أبوسط جنه شكلنا
لون واحد على حـــــــــالك شكلنا
بويا عصرنا الزلـف وانطيناك ميه



حيره ابياسجيه أمتدح وصفى
أنقى امن الذهب والماس واصفى
أعلى امن الوصف والمدح وصفى
ابكل خصله حرت وابكل سجيه



حبيبي دك بذرعانه ولجتاف
بضلعي جاسي اللبي ولجتاف
رضينه بحبس دندوشه ولجتاف
وهي سجاني وتفتر عليه



أسنونك بيض لون الوفا بيهن
أودواليبك وفر بيهن
لون جنحان عندي وفر بيهن
وجيك أبليل جد تطري عليه



حبيبي أومهجتي أودنياي ونته
ترى المالوم صعب اهواي ونته
يصاحب تاه مني القلب ونته
بس لو صادفك تلقاه إليه


حزني عليك مايبطل وناحي
اسب اللامني بودك ونا حاي
تبات الناس مستوره ونا حاي
ليلي والنجم يشهد عليه



ليش انته على الحبوك تنحال
وظلوعي ابيوم شال الظعن تنحال
إلك عقده ابدليلي عيب تنحال
لما يطلع جديد الشيب بيه



حبيبي جفاك المعبودج صبراي
حبيبي كمت اكل للروح صبراي
حبيبي من ذكرتك نفذ صبراي
حبيبي يصب فراقك عليه



غياب اجفاك لرموشي لجهنا
عميت أوروح ماعادت لجنها
وحقك غالي او دمعي لجنها
ارخصت من يوم شح وصلك عليه



يناهي جوز عن هالطبع وتراك
ومثلك منوجد بالعرب وتراك
خذك نار لوفانوس وتراك
وشعرك ليل والقصه ثريه



هذا اللي لعند اعضاي هد هد
ملهي وابد ماينصاد هد هد
اكله اقرب يقلي ليك هد هد
ارفع مشتهاك اشتظن بيه



يكت دمعي بيابي دمى واجفى
إلى ويا الخان يوم الحشر وجفى
انجان انته وليفك زعل وجفى
أنا ولفي نكرني أوخان بيه



أنام وشوك محبوبي يعاني
افز مرعوب واتخيل يعاني
هلي الدمع مرخوصه يعاني
على اللي بالوصل شحوا عليه



اندهني هم اضربك بيس واجراك
وعساك ابمثل حالي أتصير واجراك
يجي يوم الوجر فوق واجراك
واهلس ريش جنحانك بيديه



يصاحب لو تشوف اشلون كتماي
على عيوني ويسح الدمع كتماي
اشما اقل للروح سر الهوه كتماي
تحن وتهيج الساكن عليه



روحي مشت وياهم وهامت
على الما بينت منهم وهامت
اجفوف اعليك اطيرها وهامت
واخلي ادموم تجري اعلى الوطيه



عفاني جيف الى مهجه ولي روح
اداري بالعلل كلها ولي روح
ماني بحال من يبكه ولي روح
ابحالك يالقطعت الوصل بيه



لطـــب البـيـتـكم وابــــــــوق واسطي
وابـــوق أمن القـــــلاده ذهب واسطي
حسافه شفت طولي أو ماشفت وسطي
وســــــــطي كــله أقـــمار أو نور بيه



ابكـــثر مانوح ملوني يراني
طحت والشــامت ابعينه يراني
يخوتي السبع مـن جسمي يراني
اكبال اهلي وعمامي اتشوف هيه



روحي والهوى ودنياي وعداي
علي وشلون اشيل الجدم وعداي
صابر وانتظر واشـوف وعداي
ابفرح لو دوم وكـتي محيط بيه



من وجدي لهـيب الشـــوك ورباي
نديمي وعلى ادروبك اصد ورباي
ابن كلبي وضـوه للبــــيت ورباي
فرح شوفـتك من تخـــــطف عليه






بودادك آخ للدلال فخار
جدب كلمن عليه الجد فخار
اختلاج الناس من صلصال فخار
وحبيبي اختلق بالقدره العليه



تظن انساك وانته الروح واسلاك
سبب مايوم مني انقطع وسلاك
أعيش آنه عقب فرقاك وسلاك
معافي والوشاة أعملوا بيه






أنا صابر وانتظر واشوف وعداي
أنا طحت ومرضت مرض أيوب وعداي
أنا خبرك ياحبيبي درى بوعداي
البقى ابراسك هواك العمل بيه



نحيل الجسم بودادك وداراك
عجيبه الغيرك عني وداراك
أحلف ما أصل بابك وداراك
ولاقولن جنت صاحب إليه



من مثلي دمع عيني يهلهه
سبب غالب على روحي يهلهه
وعلي تحيولكم ميت يهلهه
من تبدي ترد الروح اليه



الدمع نهران بخدودي كراهه
حبيبي سلب من عيني كراهه
ليش امحبتك صارت كراهه
اشبده مني وتشمت اعداي بيه



أضعضع حيلي من فرقاك ونهار
اوعليك ادموعي صبن مزن ونهار
بعد ماعرف طعم الليل ونهار
إتعمى عين الغفت بجفاك إليه




مدري لاتناشدني على احشاي
بجيت وصب دمع عيني على حشاي
تبعت الضعن وكفوفي على حشاي
إشما مال الضعن روحي إتميل بيه



تهت محد من احباب علي شار
ينجيني الذي شمسه علي شار
حجيت المصلحه طلعت على شار
رجيت الغانمه صارت رديه



اعذرني والوكت عنك لهاني
بعزاك الزاد الي ابدا لهاني
تفر من البدن روحي لهاني
بسبب ماشالت التابوت هيه



ابنار الهجر يامهجه دموعاي
على مصابي السمه يمطر دموعاي
اشما هلن يدندوشه دموعاي
حسناتج تبدل بالف سيه



قسيت اوياك يسمر عمي أنا
أوعين الماتشوفك عمي أنا
إذا خالك فزع لك عمي أنا
تبرى أوضحك الوادم عليه


الرد

عايش اومختلي ابحالي وخالي
وشوف اهواي بعيوني وخالي
عمي دب علي جمره وخالي
جاب امهفته وهفه عليه
نديم الروح ياحنين صبلها
حنينه وشافت بعينك صبلها
مقامات العشك حبك صبلها
بقيثارة عواطف سومريه


غرابي فوك تلك الشجر ينعاب
اخاف اهلك عليك وعلي ينعاب
الجان اليس منه الجبد ينعاب
ونه كلبي تسله بين اديه


روحي برشف خدك من عداها
احب وصلك وهابك من عداها
افراكك يوم احمله ، من عداها
ازورك لو تصير احزاب اليه


تشوف اهمومي بعيونك وترها
وتغيب وتكطع بروحي وترها
يرهيك الوكت يسمر وترها
وتصير انت ابو الراهي عليه


شالوا لا على مكصد وداعي
ابليل ولا تنه الحادي وداعي
يحكلي لنسف اذراعي وداعي
بحك وخل تلوم الناس بيه


لون داءك عسير اليوم ولداك
وكلنا ياطويل العمر ولداك
وعلي الهز باب خيبر كبل والداك
السلفه انت السمه واحنا الوطيه


رفضنا كل مذله احنا وبينه
الشهامه انغرست بحينا وبينه
انت خالنه وعمنه وبينه
كف دمعك ولا تبدي الشجيه


اوحي لي تبتعد ويطول بعداك
الحال اتصير حال الضيم بعداك
حلو كل مرار العيش بعداك
بيوم اتشمتو بجفاك اليه


همي من كثر يذبل وراها
ونار الكلب ما يخمد وراها
كل شده يهل وادم وراها
فرج ، والفرج من رب البريه


الصديق اللي نشوفه نقي ونظيف
نود كل يوم نبدي اعليه ونضيف
علي طيبه نجمل طيب ونضيف
بكثر معنى الحروف الابجديه


متى من ليل هجر اجفاك تنهال
اشجره وسياط هجرك علي تنهال
عزيزه دمعتي وبجفاك تنهال
مثل هل السحاب اعلى الوطيه


انشدك من لهيب النار شكوه
اعطشت ومن السراب امليت شكوه
اشتكي عندك عليك بالف شكوه
ولا كلبك سمعها وحن عليه


الكلب شاجر على ابن أمه وداوي
تضعضع ونهدم ركنه وداوي
لا مجروح حتى اكعد وداوي
ولا غايب وكول يعود ليه


تهزهز يا كبر وانفض ترابيك
وعزيز الروح هالنايم ترابيك
اجاني العيد وعيوني ترابيك
انهض لاتشمت اعداي بيه


علام الدهر شتتن وطرنا
عكب ذاك الطرب بالهم وطرنا
الف ياحيف مكضيته وطرنا
ليالي اللي مضت متعود ليه






الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
تعرّف على الابو ذيه ونماذجها
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
شبكة ومنتديات ضحكة العراق  :: .. .. .•:*¨`*:•.₪ الأقســـام الأدبيـــــة ₪.•:*¨`*:•. .. .. :: ◦ .. الشعر الشعبي .. ◦-
انتقل الى:  
اخبار BBC العالمية
بحـث
 
 

نتائج البحث
 
Rechercher بحث متقدم
أفضل 10 أعضاء في هذا المنتدى
ابن العراق
 
اميره بـ مملكتي
 
شوق
 
سنوات ضياع
 
اميرة باحساسي
 
العیون الحزینه
 
عزف الروح
 
ahmed_83
 
حامد
 
شين اي ري
 
إغلاق
التسجيل السريع

الاجزاء المشار اليها بـ * مطلوبة الا اذا ذكر غير ذلك
اسم مشترك : *
عنوان البريد الالكتروني : *
كلمة السر : *
تأكيد كلمة السر : *

المواضيع الأخيرة
» تونسي مغترب يشفى من القصور الكلوي
الجمعة يناير 03, 2014 2:52 am من طرف ساعية لرضى الله

» عايز تفتح محل كمبيوتر شركة 4U أفضل تكنولوجيا وبأقل الأسعار
السبت مايو 04, 2013 7:28 am من طرف EL_kady Dina

» شاى الريف أكسبريس "عملاق الشاى الاخضر "Reef Tea the best green tea in the world "
الأحد فبراير 17, 2013 6:13 pm من طرف yassmine00

» العمر الانسب للزواج ؟
الخميس يونيو 21, 2012 3:42 pm من طرف كبريائي هزم غرور الرجال

» ماجد المهندس
الخميس سبتمبر 08, 2011 8:38 pm من طرف ابن العراق

» قناة mcp موسيقى من بغداد
الخميس سبتمبر 08, 2011 8:35 pm من طرف ابن العراق

» حفلة الفنانة مريام فارس في العراق
الخميس سبتمبر 08, 2011 8:33 pm من طرف ابن العراق

» محاولة اغتيال الفنان ابراهيم طاطلس
الخميس سبتمبر 08, 2011 8:29 pm من طرف ابن العراق

» يومية تسألني...
الخميس سبتمبر 08, 2011 8:24 pm من طرف ابن العراق

» صاحب قناة MCP الفنان ماجد المهندس
الخميس سبتمبر 08, 2011 8:06 pm من طرف ابن العراق


Copyright ©2010-2010 dhkatiraq5.yoo7.com
 جميع الحقوق محفوظة لشبكة ومنتديات ضحكة العراق
إتصل بنا
 
ان جميع المواضيع الموجودة في المنتدى لاتعبر عن وجهة نظر منتدى ضحكة العراق وانما تعبر عن وجهة نظر كاتبها فقط